,,მთიანი აჭარის სალაშქრო ბილიკების გამყოლი“
პროფესიული გადამზადების პროგრამა
ხანგრძლივობა 8 კვირა
პროგრამის აღწერა:
პროფესიული გადამზადების პროგრამაზე სწავლა შეუძლია მინიმუმ სრული ზოგადი განათლების მქონე პირს, რომელსაც აქვს გამყოლად საქმიანობის ან დამოუკიდებლად მთიან აჭარაში საფეხმავლო ბილიკების დალაშქვრის პრაქტიკული გამოცდილება, დაინტერესებულია სათავგადასავლო ტურიზმის ინდუსტრიაში ჩართვით და პროფესიული, კარიერული განვითარებით. პროგრამის ფარგლებში პირს მიეცემა საშუალება მოკლე პერიოდში გაიუმჯობესოს ცოდნა, უნარები, დასაქმდეს ან დამოუკიდებლად განახორციელოს სალაშქრო გამყოლის საქმიანობა. პროგრამის სწავლის შედეგების მიღწევა უზრუნველყოფილია სსიპ კოლეჯის ,,ბლექსი“ კვალიფიციური პროფესიული განათლების მასწავლებლების, ინსტრუქტორებისა და ა(ა)იპ სათავგადასავლო ტურიზმის სკოლის საერთაშორისო სტანდარტების შესაბამისად სერტიფიცირებული ინსტრუქტორების მიერ. სწავლება მიმდინარეობს 8 კვირის მანძილზე, კვირაში 25- დან 40 – მდე საათობრივი დატვირთვით. სასწავლო პროცესი მიმდინარეობს, როგორც დაწესებულებაში ასევე, ველურ ბუნებაში. შესაძლებელია პროგრამით გათვალისწინებული თეორიული კომპონენტის სწავლება განხორციელდეს დისტანციურად. პროფესიული გადამზადების პროგრამის ფარგლებში გათვალისწინებული სწავლის შედეგების მიღწევის შემდეგ კურსდამთავრებული მიიღებს სახელმწიფოს მიერ აღიარებულ პროფესიული განათლების დამადასტურებელ სერტიფიკატს, ქართულ და ინგლისურ ენებზე (დანართით), რომელშიც ფიქსირდება პირის მიერ პროგრამის ფარგლებში მიღწეული ცოდნა და უნარები. პროგრამის დანართში მითითებული იქნება, რომ პროგრამა განხორციელებულია: სსიპ კოლეჯის ,,ბლექსი“, ა(ა)იპ სათავგადასავლო ტურიზმის სკოლის, აჭარის ავტონომიური რესპუბლიკის ტურიზმისა და კურორტების დეპარტამენტისა და ა(ა)იპ ტურისტული პროდუქტების განვითარების სააგენტოს თანამშრომლობის ფარგლებში. პროგრამის შემუშავების მხარდამჭერია ,,გერმანიის საერთაშორისო თანამშრომლობის საზოგადოება (GIZ).
პროგრამის მიზანი:
პროფესიული გადამზადების პროგრამა მიზნად ისახავს უპასუხოს აჭარაში სათავგადასავლო ტურიზმის მიმართულებით კვალიფიციურ კადრებზე არსებულ მოთხოვნას და გადაამზადოს მთიანი აჭარის სალაშქრო ბილიკების გამყოლები. პროგრამის მიზანია კვალიფიცირებული კადრების მომზადებით აჭარაში სალაშქრო საგამყოლო საქმიანობის მომსახურების ხარისხის განვითარების ხელშეწყობა, ფორმალური განათლების ფარგლებში გამყოლთა ცოდნისა და უნარების გაუმჯობესება, რომელიც მათ ასევე, მისცემს შესაძლებლობას დაგეგმონ და განაგრძონ საკუთარი პროფესიული განვითარება სათავგადასავლო ტურიზმის ფარგლებში. კერძოდ, პროგრამის ფარგლებში გათვალისწინებული რამდენიმე სწავლის შედეგი თანხვედრაშია პროფესიული განათლების სისტემაში არსებულ ,,საფეხმავლო გამყოლის“ პროფესიული გადამზადების პროგრამასთან. შესაბამისად, კურსდამთავრებულს შეუძლია თავისი კომპეტენციების არეალის გაფართოების პროცესში, ფორმალური განათლების აღიარების ფარგლებში, დაიდასტუროს უკვე მიღწეული სწავლის შედეგები. პროგრამის მიზანს ასევე, წარმოადგენს აჭარაში სალაშქრო ბილიკების ქსელის განვითარების ხელშეწყობა და სფეროს პოპულარიზაცია.