საქართველოს განათლების, მეცნიერებისა და ახალგაზრდობის მინისტრმა გივი მიქანაძემ, მოადგილე ზვიად გაბისონიასთან და აჭარის განათლებისა და სპორტის მინისტრ მაია ხაჯიშვილთან ერთად კოლეჯ ,,ბლექსის” მშენებარე კამპუსი დაათვალიერა.
ინფრასტრუქტურული პროექტის ფარგლებში უკვე აშენებულია 560 სტუდენტზე გათვლილი სამსართულიანი შენობა შეკიდული ვიტრაჟული სისტემით, სადაც განთავსდება თეორიული და პრაქტიკული აუდიტორიები, ფაბლაბი, სტუდენტური სივრცე, შეხვედრების ოთახი, საკონფერენციო დარბაზი, ბიბლიოთეკა, არქივი, კაფეტერია, სამედიცინო კაბინეტი და სპორტული დარბაზი. პროექტით 50 სტუდენტზე გათვლილ საერთო საცხოვრებლიცაა გათვალისწინებული.
კოლეჯში დაგეგმილია 30 პროფესიული საგანმანათლებლო პროგრამის განხორციელება მომსახურებების, ინჟინერიის, წარმოებისა და მშენებლობის, ინფორმაციისა და კომუნიკაციის ტექნოლოგიების მიმართულებებით.
მინისტრები ასევე სასწავლებლის ცენტრალურ კამპუსში იმყოფებოდნენ. სასწავლო ლაბორატორიები დაათვალიერეს. გაეცნენ კოლეჯის ინფრასტრუქტურას. შეხვედრა გამართეს კოლეჯის პროფესიული განათლების მასწავლებლებთან და სასწავლებლის ადმინისტრაციასთან.